ဘာသာရှိ၊ ဘာသာမဲ့နဲ့ ဘာသာလွတ်လူသားတို့အကြောင်း (၄)

 ဘာသာရှိ၊ ဘာသာမဲ့နဲ့ ဘာသာလွတ်လူသားတို့အကြောင်း (၄)

-လင်းထက်ဆွေ- 

ယမန်နေ့မှအဆက် ....

ဘာသာလွတ်သူ ဟာ ဘာသာရေးအစဉ်အလာများကို ဘောင်ခတ်မစွဲလန်းသူ ဖြစ်ပေမယ့် ဘာသာရေးအစဉ်အလာများကို တန်ဖိုးရှိတဲ့ လောကရတနာများ အဖြစ်မြင်ပါတယ်။ ဘာသာရှိသူ ဘာသာစွဲသန်သူတွေဟာ မြေထိန်းနံရံကြီးတွေနဲ့ အလားသဏ္ဍာန်တူပါတယ်။ ဘာသာရှိသူ ဘာသာစွဲသန်သူတွေရဲ့ နှစ်နှစ်ကာကာ ကြိုးပမ်းအားထုတ်မှုဆိုတာတွေ မရှိခဲ့ရင် တန်ဖိုးရှိတဲ့ လောကရတနာများဖြစ်ကြတဲ့ ဘာသာရေးအစဉ်အလာတွေဟာ အချိန်ရေစီးနဲ့အတူ ပျောက်ကွယ်ဆုံးရှုံးသွားမှာ ဖြစ်လို့ပါပဲ။ ဒီအတွက်တော့ ဘာသာရှိသူ၊ ဘာသာစွဲသန်သူတွေအားလုံးရဲ့ ကြိုးပမ်းမှုတွေကို ဘာသာလွတ်သူက ကျေးဇူးတင်စွာနဲ့ လေးစားဦးညွှတ်နေပါတယ်။

ဒီလိုဆိုရင် ဘာသာလွတ်သူ တစ်ယောက်ဖြစ်ဖို့ ဘာတွေလိုအပ်သလဲ။ ဘာသာမဲ့သူ တစ်ယောက်လိုပဲ ဘာသာရေး အင်စတီကျူးရှင်းများနဲ့ လွတ်ကင်းစွာရပ်တည်ရဲတဲ့သူ ဖြစ်ဖို့လိုအပ်ပါတယ်။ ဓမ္မကို ရှာဖွေရာမှာ လွတ်လပ်ပွင့်လင်းတဲ့ သဘောထားအမြင် ရိုးသားဖြောင့်မတ်တဲ့ စိတ်ထားတွေလည်း လိုအပ်ပါတယ်။ အသိပညာကိုရှာဖွေရာမှာ အင်္ဂလိပ်ဘာသာစကားဟာ ဓမ္မတရားပေါင်းစုံ၊ ဒဿနပညာ၊ သိပ္ပံပညာ၊ အနုပညာ၊ လူမှုသိပ္ပံပညာစသော ဘာသာရပ်ပေါင်းစုံ ပွင့်လန်းရာ ဥယျာဉ်သာကြီးလိုပဲဖြစ်လို့ အင်္ဂလိပ်ဘာသာစကားကိုလည်း နက်နက်နဲနဲ ဖတ်ရှုလေ့လာနိုင်ဖို့လဲ လိုပါလိမ့်မယ်။ ဒါအပြင် မိမိကျင့်သုံးအားထုတ်သော ဓမ္မတရားနဲ့ဆိုင်တဲ့ ဘာသာစကားတွေကို သိမှတ်နားလည်နိုင်ဖို့လည်း လိုပါလိမ့်မယ်။ မိမိကိုယ်ပိုင် ဝဖန်ဆုံးဖြတ်နိုင်ဖို့အတွက် ဝေဖန်ဆန်းစစ်တွေးခေါ်နိုင်စွမ်း (Critical Thinking Skill) လည်း လိုပါလိမ့်မယ်။

ဒါဆိုရင် မေးစရာတစ်ခုရှိတယ်။ ဘာသာရှိသူတွေလည်း အလွယ်ရောက်နိုင်တဲ့ ခရီးတစ်ခုကို ဘာသာလွတ်သူက ဘာလို့ ခက်ခက်ခဲခဲသွားဖို့ ကြိုးစားနေရတာလဲဆိုတဲ့ မေးခွန်းပါပဲ။ ဒီမေးခွန်းအတွက် အဖြေက သုံးပိုင်း ရှိတယ်။

ပထမပိုင်းအဖြေကတော့ ဘာသာလွတ်သူတွေဟာ ဘာသာရှိသူတွေထက်စာရင် ကိုယ်ရည်ကိုယ်သွေး ပြင်းထန်သူတွေ၊ တစ်သီးတစ်သန့်ဖြစ်သူတွေ၊ သူတစ်ပါးကို မယုံတတ်သူတွေ ဖြစ်ကောင်းဖြစ်ပါလိမ့်မယ်။ ဘာသာရေး အင်စတီကျူးရှင်းတွေဟာ နှစ်ထောင်ချီတဲ့ ဓမ္မရတနာတွေကို သယ်ဆောင်လာတာ ဖြစ်သလို ဒီအထဲမှာ မိမိဓမ္မခရီးအတွက် မလိုအပ်တဲ့အမှိုက်သရိုက်တွေလည်း ပါနေနိုင်ပါတယ်။ ဓမ္မတရားတစ်ရပ်ကို မျက်စိစုံမှိတ် လက်ခံတာထက် အသေအချော စိစစ်ရွေးချယ် ကျင့်သုံးအပ်တယ်လို့ ဘာသာလွတ်သူတွေက ခံယူပါတယ်။

ဘာသာတရားအသီသီးဟာ ပဒေသရာဇ်ခေတ် ယဉ်ကျေးမှုနောက်ခံမှာ ပေါ်ပေါက်လာခဲ့ကြတာ ဖြစ်သလို ခေတ်သစ်လောကရဲ့ သိပ္ပံပညာနဲ့ အခြားသော အဆင့်မြင့်ပညာရေးတွေ မထွန်းကားသေးခင်မှာ ပေါ်ပေါက်ခဲ့ကြတာ ဖြစ်တယ်။ ဒါကြောင့်မို့ ဘာသာတရားတွေရဲ့ အထည်ကိုယ်မှာ ဒီပဒေသရာဇ်ခေတ် ယဉ်ကျေးမှုနောက်ခံကာလက လူမှုရေးတန်ဖိုးတွေ၊ ကိုယ်ကျင့်တရားတန်ဖိုးတွေ ကပ်ပါနေမှာ အမှန်ပါပဲ။ ခေတ်မမီတော့တဲ့ လောကအမြင်၊ ဘဝအမြင်တွေလည်း ပါနေမှာပါပဲ။ ဘာသာလွတ်သူဟာ ဒါတွေကို စေ့ငုလေ့လာပြီးတော့ စွန့်ဖို့လိုအပ်ရင် သံယောဇဉ်မထားဘဲ၊ မတွယ်တာဘဲ လွတ်လွတ်ကျွတ်ကျွတ်ကြီး စွန့်ပစ်ရဲတဲ့သူလည်း ဖြစ်ပါတယ်။ ဘာသာရှိသူတစ်ယောက်က ဝေဝေဝါးဝါးနဲ့ ချီတုံချတုံဖြစ်နေမယ့် ကိစ္စမျိုးတွေမှာ ဘာသာလွတ်သူက ရဲရင့်တဲ့ခြေလှမ်းကို လှမ်းမှာပါပဲ။

ဘာသာလွတ်သူရဲ့အမြင်မှာ ဘာသာရေးဟာ အသုံးချရမယ့်ကိရိယာပဲ ဖြစ်တယ်။ စင်ပေါ်တင်ပြီးဖူးဖူးမှုတ်ထားရမယ့် အရာမဟုတ်ဘူးလို့မြင်တယ်။ တစ်ဖက်ကမ်းကို ကူးဖို့လှေလို၊ နံရံကို ကျော်တက်ဖို့ လှေကားလိုပဲ သုံးရမယ့်အရာလို့ မြင်ပါတယ်။ အသုံးချရမယ့်ကိရိယာဆိုတာ အသုံးကျဖို့လိုတယ် လက်တွေ့ကျကျ အကျိုးရှိဖို့လိုတယ်လို့ မြင်ပါတယ်။ ဘာသာရေးဟာ လူသားအကျိုးအတွက် တည်ရှိနေတာဖြစ်ပြီးတော့ လူဟာ ဘာသာရေးအကျိုးအတွက် တည်ရှိနေတာ မဟုတ်ဘူးလို့ မြင်ပါတယ်။ လူသားဟာ ဘာသာရေးအင်စတီကျူးရှင်းတွေရဲ့ မှိုင်းတိုက်အသုံးချမှုကို ခံရပြီဆိုရင်တော့ ဒါဟာ ဝမ်းနည်းစရာကောင်းတဲ့ လွဲချော်မှုတစ်ခု၊ မှားယွင်းမှုတစ်ခုပါပဲ။ ပေါ့စေလိုလို့ ကြောင်ရုပ်ထိုးတာ ဆေးအတွက်ကြောင့် လေးရတဲ့အဖြစ်မျိုးပါ။

ဒုတိယပိုင်းအဖြေကတော ဘာသာရှိသူတွေရဲ့ ဓမ္မခရီးဟာ Package Tour နဲ့တူပါတယ်။ အားလုံးက အစ မှ အဆုံး အတိအကျပြဋ္ဌာန်းသတ်မှတ်ထားပြီးဖြစ်လို့ အထူးတလည် လုပ်စရာမရှိဘဲ ခေါ်တဲ့နောက်လိုက်၊ ကျွေးတာစား၊ ပြောပြတာနားထောင် ဆိုတာမျိုးပါပဲ။ ဘာသာလွတ်သူတွေရဲ့ ဓမ္မခရီးက Free Individual Tour နဲ့တူပါတယ်။ အတိအကျ ပြဋ္ဌာန်းသတ်မှတ်ထားတာ ဘာမှမရှိဘဲ မိမိဘာသာတစ်ကိုယ်တော် စူးစမ်းရှာဖွေသွားရတဲ့အရသာ ရှိပါတယ်။ သစ္စာတရားကို ရှုထောင့်အမျိုးမျိုးကနေ ရှာဖွေနေရတာကိုက ဓမ္မခရီးတစ်ခုရဲ့အလှ ဖြစ်တယ်လို့ ဘာသာလွတ်သူက ခံယူပါတယ်။

ဒီနေ့ ကမ္ဘာလောကကြီးဟာ တိုင်းပြည်နိုင်ငံပထဝီနယ်နမိတ်တွေ ကျုံ့လို့တစ်လောကလုံး ရွာကြီးတစ်ရွာလို ဖြစ်လာခဲ့ပါပြီ။ အင်တာနက်နဲ့ ဂြိုဟ်တုဆက်သွယ်ရေးစနစ်တွေကြောင့် ဘာသာတရားတွေ၊ ယဉ်ကျေးမှုတွေဟာ အပြန်အလှန်မြင်ခွင့်၊ လေ့လာခွင့်ရတဲ့ကာလ ဖြစ်နေပါပြီ။ ဓမ္မတရားအသီးသီးကလည်း ဘူဖေးစားပွဲကြီးလို လူသားရဲ့ရှေ့မှာ အဆင်သင့်ရှိနေခဲ့ပါပြီ။ ဒီလို အခြေအနေမှာ ပန်းဥယျာဉ်ထဲက ပန်းမာလ်အမျိုးမျိုးရဲ့ဝတ်ရည်ကို သောက်ယူနိုင်တဲ့ ပျားတို့ပမာ ကျင့်ကြံသင့်တယ်လို့ ဘာသာလွတ်သူက မြင်ပါတယ်။ ပန်းတစ်မျိုးစီမှာ ထူးခြားတဲ့အာဟာရဓာတ်နဲ့ သင်းပျံ့တဲ့မွှေးရနံ့ ကိုယ်စီရှိနေမှာ အမှန်ပါပဲ။ ဘာသာဓမ္မတရားတိုင်းမှာလည်း ကိုယ်ပိုင်အလှတရားတွေ၊ နက်နဲတဲ့သစ္စာတရားတွေ ရှိနေပါတယ်။ ဘာသာလွတ်သူအတွက် အမည်နာမတွေ၊ ဆိုင်းဘုတ်တွေထက် ဓမ္မရသရဲ့ တရားကိုယ် အနှစ်သာရသဘောတွေကိုပဲ ပိုမိုဂရုစိုက်တန်ဖိုးထား ဖွေရှာကျင့်ကြံပါတယ်။

ဓမ္မတရားတစ်ခုဟာ ကိုယ်ပိုင်အရသာတစ်ခုစီနဲ့ စိတ်ဝိညာဉ်ကို အာဟာရ ဖြစ်စေပါတယ်။ ဓမ္မတရားတွေရဲ့ အသုံးဝင်မှုဟာ အသုံးချတတ်သူရဲ့ ကျွမ်းကျင်လိမ္မာမှုအပေါ်ပဲ တည်တယ်လို့ ဘာသာလွတ်သူက မြင်ပါတယ်။ ဓမ္မတရားတွေရဲ့ မတူခြားနားကွဲပြားမှုကို မြင်သလို၊ ဓမ္မတရားတွေရဲ့ ယေဘုယျဆင်တူမှုသဘောတွေကိုလည်း မြင်ပါတယ်။ ဘာသာလွတ်သူဟာ ဓမ္မတရားတွေကို ကြည့်တဲ့အခါ အပေါ်ယံခြားနားမှုတွေအောက်က တရားကိုယ်သဘောကိုပဲကြည့်ပြီး ဓမ္မကို သေသေချာချာ အနက်ထင်အောင် ဖွင့်ဆိုကျင့်သုံးသူသာ ဖြစ်ပါတယ်။

တတိယပိုင်းအဖြေကတော့ ဘာသာလွတ်သူတို့ရဲ့လမ်းဟာ ထောင်စုသစ်ရဲ့ ဓမ္မခရီးလမ်းအသစ်ဖြစ်တဲ့ ဘာသာရေး ဗဟုဝါဒ (Religious Pluralism) ကို ဖော်ဆောင်နေလို့ပါပဲ။ ငြိမ်းချမ်းတဲ့ကမ္ဘာကြီးဆိုတာ မတူကွဲပြားတဲ့၊ ဗဟုသဘောဆောင်တဲ့ ဘာသာရေးယဉ်ကျေးမှုအမွေအနှစ်တွေ၊ တန်ဖိုးတူ စင်ပြိုင်ရပ်တည်နေနိုင်မှုကို ဝမ်းမြောက်ကြိုဆိုလက်ခံ ကျင့်သုံးနိုင်ခြင်းအပေါ်မှာပဲ အခြေခံလို့သာ တည်ဆောက်နိုင်တယ်လို့ ဘာသာလွတ်သူတွေက စွဲမြဲစွာယုံကြည်ပါတယ်။

ဘာသာရေးယဉ်ကျေးမှုအမွေအနှစ်တွေဟာ လူမျိုးတစ်မျိုး ဒေသတစ်ခုနဲ့တင် သက်ဆိုင်တာမဟုတ်ဘဲ လူသားအနွယ်၊ လူ့မိသားစုတစ်ခုလုံးရဲ့ အမွေအနှစ်တွေဖြစ်တယ်လို့ ဘာသာလွတ်သူက ခံယူတယ်။ အတိတ်ကာလတုန်းကတော့ ဘာသာတရားတွေ တစ်ခုနဲ့တစ်ခု ထိတွေ့ကြတဲ့အခါ တစ်ဖက်ကိုတစ်ဖက်က ယှဉ်ပြိုင်အနိုင်ယူလိုခဲ့ကြတယ်။ မိမိရဲ့ ဘာသာတရားကိုပဲ တစ်လောကလုံး ယုံကြည်ကိုးကွယ်စေချင်ခဲ့ကြတယ်။ ဒီ စိတ်သဘောထားဟာ လောကရဲ့ သာယာငြိမ်းချမ်းမှုကို အန္တရာယ်ဖြစ်စေကြောင်းကို လူသားတွေ သိခဲ့ကြပါပြီ။

မျက်မှောက်ခေတ်ကာလအတွက် အသင့်တော်ဆုံးနဲ့ အမှန်ကန်ဆုံး၊ လောကရဲ့ ငြိမ်းချမ်းရေးနဲ့ အလျှော်အဖြစ်ဆုံး ဘာသာရေးရပ်တည်ချက်ကတော့ ဘာသာရေးဗဟုဝါဒ ရပ်တည်ချက်ပဲ ဖြစ်ပါတယ်။ (ဘာသာရေး ဗဟုဝါဒ အကြောင်း ကို သီးခြားဆောင်းပါးတစ်ပုဒ်ရေးပြီး တင်ပြပါဦးမယ်) ဘာသာရေးဗဟုဝါဒ ဆိုတာကတော့ ဘာသာတရားတွေဟာ ရင်းမြစ်အမျိုးမျိုးကနေ ပေါ်ထွက်လာခဲ့ကြတာဖြစ်လို့ မတူညီတဲ့လမ်းစဉ်တွေ၊ မတူညီတဲ့ ပန်းတိုင်တွေ ရှိနေကြတယ်ဆိုတာ လေးနက်စွာလက်ခံရမယ့် အမှန်တရားပဲ ဖြစ်ပါတယ်။

ဘာသာရေးဗဟုဝါဒ ရဲ့ အမြင်အရ ဒီဘာသာရေးဗဟုသဘောကို လက်ခံရုံမက ဒီလိုဘာသာတရားတွေ ကွဲပြားခြားနားစွာနဲ့ တန်ဖိုးတူယှဉ်ပြိုင်ရပ်တည်မှုဟာ လိုလားတောင့်တသင့်တဲ့ အခြေအနေဖြစ်တယ်ဆိုတာကို လက်ခံရမှာဖြစ်တယ်လို့ ဘာသာလွတ်သူက ရှုမြင်သုံးသပ်ပါတယ်။ ဘာသာလွတ်ခြင်းဆိုတာဟာ ဘာသာမဲ့ခြင်းလို ဘာသာတရားတွေရဲ့ အနှစ်သာရတန်ဖိုးကို မပစ်ပယ်သလို ဘာသာရှိခြင်းလိုမျိုး မိမိအသိဥာဏ်ကို ဘာသာတရားတစ်ခုခုရဲ့ ဘောင်ထဲမှာပဲ လှောင်ပိတ်သော့ခတ် မထားပါဘူး။ အနာဂတ်ရာစုနှစ်တွေမှာ ဘာသာလွတ်နည်းနဲ့ ဓမ္မခရီးကို လျှောက်လှမ်းသူတွေ များသထက်များလာနိုင်လိမ့်မယ်၊ ဒီလိုများပြားတိုးတက်လာရင် ဘာသာရေးအစဉ်အလာတွေ အချင်းချင်း အပြန်အလှန်နားလည်မှု လေးစားမှုတွေ တိုးတက်ဖြစ်ပွားလာပြီးတော့  ဘာသာရေးဟာ လူဘောင်လောကတစ်ခုလုံးကို ဥာဏ်ပညာ၊ ချစ်ခြင်းမေတ္တာနဲ့ ထုံမွမ်းစေလို့၊ ဓမ္မတရားတွေရဲ့ ငြိမ်းအေးခြင်းရသကို အမှန်ပဲပေးစွမ်းနိုင်မယ်လို့ ဘာသာလွတ်သူက လေးနက်စွာခံယူပါကြောင်း တင်ပြအပ်ပါတယ်။                   

ဘာသာရှိ၊ ဘာသာမဲ့နဲ့ ဘာသာလွတ်လူသားတို့အကြောင်း (၃)

ဘာသာရှိ၊ ဘာသာမဲ့နဲ့ ဘာသာလွတ်လူသားတို့အကြောင်း (၃)
-လင်းထက်ဆွေ-

(အကြောင်းအမျိုးမျိုးကြောင့် အပိုင်း-၃ တင်ဆက်ပေးရန် နောက်ကျသွားသည့်အတွက် အနူးအညွှတ်တောင်းပန်အပ်ပါသည် ..)

တကယ်ပဲ လူတစ်ယောက်မှာ ရွေးချယ်စရာက ဘာသာရှိအဖြစ်နဲ့ ဘာသာမဲ့အဖြစ် နှစ်မျိုးပဲ ရှိသလား။ စာရေးသူတို့ ငယ်စဉ်ကာလတုန်းကတော့ ဘာသာမဲ့အဖြစ်ဆိုတာတောင် ရွေးချယ်ခွင့်မရှိသလိုပါပဲ။ လူမှန်ရင် ဘာသာတစ်ခုခု ရှိကိုရှိရမယ်ဆိုတဲ့ သတ်မှတ်ချက်ကို ပတ်ဝန်းကျင်လူ့အဖွဲ့အစည်းက အသေဆုပ်ကိုင်ထားပါတယ်။ ဒီနေ့ခေတ်ကာလကတော့ အရင်ထက်စာရင် လူတွေရဲ့ ပုဂ္ဂလိကယုံကြည်မှုတွေကို ပိုမိုလွတ်လပ်ခွင့်ပေးလာလို့ ဘာသာမဲ့ရပ်တည်သူတွေလည်း ရှိလာပါပြီ။ ဒါပေမယ့် ဘာသာမဲ့တွေ ရဲ့ တရားဝင်ရပ်တည်မှု ရရှိအောင်တော့ ကာလအတော်ကြာအောင်စောင့်ရလိမ့်ဦးမယ်လို့ ယူဆပါတယ်။ 
မိမိရဲ့ကိုယ်ပိုင်အမြင်ကို ပြောရရင်တော့ ရွေးချယ်စရာက ဘာသာရှိအဖြစ်နဲ့ ဘာသာမဲ့အဖြစ် နှစ်မျိုးအပြင် နောက်ထပ်တစ်မျိုး ရှိသေးတယ်လို့ မြင်ပါတယ်။ ဘာသာရှိခြင်းက ပထမလမ်း၊ ဘာသာမဲ့ခြင်းက ဒုတိယလမ်းဆိုရင် တတိယလမ်းက ဘာဖြစ်မလဲ။ တတိယလမ်းကတော့ ဘာသာစွဲမရှိတဲ့ ဘာသာလွတ်သူ (Religious Free Thinker) ရဲ့လမ်း ဖြစ်မယ်ထင်ပါတယ်။ ဘာသာလွတ်သူရဲ့ ရပ်တည်မှုကတော့ ထူးခြားတဲ့အနေအထားဖြစ်တယ်လို့ ထင်ပါတယ်။ ဘာသာလွတ်သူရဲ့ ခံယူချက်တွေထဲက အချို့ဟာ ဘာသာရှိသူတွေနဲ့ တူနေမယ် အချို့တွေကတော့ ဘာသာမဲ့သူတွေနဲ့ ဆင်ဆင်တူနေမယ်။ နောက်ပြီးတော့ ဘာသာရှိသူရော ဘာသာမဲ့သူမှာပါ မရှိတဲ့ သီးခြားသဘောဆောင်တဲ့ ခံယူချက်တွေလဲ ဘာသာလွတ်သူတွေမှာ ရှိနေတယ်ဆိုတာ တွေ့ရတယ်။ ဘာသာလွတ်သူဟာ ငယ်စဉ်က ဘာသာရှိသူ ဖြစ်ခဲ့မယ်။ ကြီးပြင်းလာတဲ့အခါ ဘာသာမဲ့သူ အဖြစ်ကိုလည်း ရောက်ချင်ရောက်ခဲ့ဖူးမှာပဲ။ ဘာသာရှိခြင်းနဲ့ ဘာသာမဲ့ခြင်း ရဲ့ ကောင်းကျိုး ဆိုးပြစ်တွေကို ကိုယ်တိုင်မြင်တွေ့ခံစားလာရပြီးမှ ဘာသာလွတ်သူအဖြစ်ကို ရောက်ရှိလာခဲ့တာဖြစ်တယ်။

ဘာသာလွတ်သူတွေမှာ ရှိနေတဲ့ ဘာသာရေးနဲ့ဆိုင်တဲ့ ခံယူချက်တွေကို အနှစ်ချကြည့်ရင် အောက်ပါအတိုင်း တွေ့ရတယ်။

(၁) နာမ်ဝိညာဉ်ပိုင်းဆိုင်ရာပမာဏ(Transcendental/ Spiritual Dimension) ဟာ လူသားဘဝဖြစ်တည်မှုရဲ့ မရှိမဖြစ်အရေးပါတဲ့ အစိတ်အပိုင်းလို့ ခံယူတယ်။ အမြင့်မားဆုံးလောကုတ္တရာသစ္စာတရား ရှိတယ်လို့ မြင်ပါတယ်။ ဒီအမြင့်မားဆုံး လောကုတ္တရာသစ္စာတရားကို လူသားဟာ မျက်မှောက်ပြု ထိတွေ့သိမြင်နိုင်တယ်လို့လည်း မြင်ပါတယ်။(ဒီ အချက်က ဘာသာမဲ့သူတွေ နဲ့ အဓိကကွဲပြားချက်ပဲ ဖြစ်တယ်)

(၂) ဒီ အမြင့်မားဆုံးလောကုတ္တရာ သစ္စာတရားဟာ ဘာသာစကား ပညတ်စံနစ်တွေကို လွန်နေတာကြောင့် သစ္စာတရားကို တစ်စုံတစ်ခုသော ဘာသာရေး အင်စတီကျူးရှင်း-ဂိုဏ်းဂဏ တစ်ခုခုက ယတိပြတ်အကြွင်းမဲ့ ပိုင်ဆိုင်တယ်ဆိုတာကို ငြင်းပယ်ပါတယ်။ (ဒီ အချက်က ဘာသာရှိသူတွေနဲ့ အဓိကကွဲပြားချက်ပဲ ဖြစ်တယ်)

(၃) တစ်ဆက်တည်းအားဖြင့် ဘာသာလွတ်သူတွေဟာ ဘာသာရေး အင်စတီကျူးရှင်း-ဂိုဏ်းဂဏ တစ်ခုခုရဲ့ အကြွင်းမဲ့ဆုံးဖြတ်ခွင့်အာဏာကိုလည်း ငြင်းပယ်ပါတယ်။ ဘာသာလွတ်သူတွေကို ဘယ်ဘာသာဝင်ဖြစ်ပါတယ်လို့ ယေဘုယျပြောလို့ရပေမယ့် ဘာသာတရားကို အနက်ဖွင့်ရာမှာ ဘာသာလွတ်သူဟာ မိမိကိုယ်ကို အပြည့်အဝတာဝန်ယူဖွင့်ဆိုသူ ဖြစ်ပါတယ်။ ဘာသာလွတ်သူတွေ အားလုံးလောက်နီးပါးဟာ ဘာသာရေးဆိုင်ရာ ဂိုဏ်းဂဏစွဲမထားသူတွေ ဖြစ်ကြတယ်။

(၄) အမြင့်မားဆုံးလောကုတ္တရာသစ္စာတရားဟာ အဆင့်မြင့်ဘာသာတရားကြီးတွေအားလုံးမှာ အသွင်အမျိုးမျိုး အကန့်အသတ်အမျိုးမျိုးနဲ့ ဖော်ဆောင်တည်ရှိနေနိုင်ခွင့်ကို အလေးအနက်ယုံကြည်ပါတယ်။ ဓမ္မတရားအသီးသီးရဲ့ ကွဲပြားခြားနားသောပန်းတိုင်များ တည်ရှိနေမှုကို လက်ခံပါတယ်။

(၅) တစ်ဆက်တည်းအားဖြင့် ဘာသာလွတ်သူတွေဟာ အမြင့်မားဆုံးလောကုတ္တရာ သစ္စာတရားထံကို ချဉ်းကပ်ရောက်ရှိနိုင်တဲ့ နည်းလမ်းတွေလည်း များစွာရှိနိုင်တယ်ဆိုတဲ့အချက်ကို လက်ခံသူတွေ ဖြစ်ပါတယ်။

(၆) ဘာသာလွတ်သူတွေဟာ ဓမ္မတရားအသီးသီးတွေရဲ့ မတူကွဲပြား ခြားနားမှုကို လက်ခံတဲ့အပြင် ဓမ္မတရားတစ်ခုစီရဲ့ ဘောင်ထဲမှာလဲ မတူကွဲပြား ခြားနားတဲ့ အနက်ဖွင့်ဆိုချက်တွေ ရှိနေတာ ဖြစ်သင့်တဲ့၊ သဘာဝကျတဲ့အရာဖြစ်တယ်ဆိုတာကို လက်ခံပါတယ်။

(၇) ဘာသာလွတ်သူတွေဟာ မိမိစရိုက်သဘာဝနဲ့ ကိုက်ညီတဲ့ဓမ္မတရားတစ်ခုခုကို အခြေခံထား ကျင့်သုံးဆောက်တည်သော်လည်း အခြားအခြားသော မိမိနဲ့ အလျှော်ဖြစ်တဲ့ ဓမ္မတရားတွေရဲ့ သွန်သင်ချက်တွေကိုလည်း ဝေဖန်ဆန်းစစ်ကာ လက်ခံကျင့်သုံးခြင်း ပြုနိုင်သူတွေ ဖြစ်ပါတယ်။

(၈) ဘာသာလွတ်သူတွေဟာ အခြားသော ဓမ္မတရားတွေအပေါ်သာမက ဒဿနပညာ၊ သိပ္ပံပညာ၊ အနုပညာ၊ လူမှုသိပ္ပံပညာ စသော ဘာသာရပ်ဆိုင်ရာ နယ်ပယ်အသီးသီးရဲ့ ကြိုးစားအားထုတ်လေ့လာတွေ့ရှိချက်များကိုလည်း ပွင့်လင်းတက်ကြွသောအမြင်၊ အစွဲလွတ်သောစိတ်ထားနဲ့ ဝေဖန်ဆန်းစစ်ကာ လက်ခံကျင့်သုံးခြင်း ပြုနိုင်သူတွေ ဖြစ်ပါတယ်။

ဘာသာရေး အပေါ် ဘာသာလွတ်သူရဲ့အမြင်

ဒီအချက်တွေကိုကြည့်ရင် ဘာသာလွတ်သူဆိုတာ ဘာသာရေးအစဉ်အလာတစ်ခုခုကိုပဲ ဘောင်ခတ်မစွဲလမ်းသူ ဘာသာရေးအင်စတီကျူးရှင်းများနဲ့ လွတ်ကင်းစွာရပ်တည်နေသူဖြစ်ပေမယ့် ဘာသာမဲ့သူလို ဘာသာရေးဆိုင်ရာပန်းတိုင်ကျင့်စဉ်နဲ့ အမှန်တရားတွေကို ပစ်ပယ်သူတွေ မဟုတ်တာကို တွေ့ရပါတယ်။ ဒေါင်းငှက်တွေဟာ ရေသောက်တဲ့အခါမှာ အဆိပ်အတောက်ကို ဖယ်ရှားပြီးတော့ သန့်စင်တဲ့ရေကို ခွဲထုတ်ပြီးသောက်နိုင်သလိုပဲ ဘာသာလွတ်သူဟာ ဘာသာရေး အစဉ်အလာတွေမှာ ရှိနေတဲ့ တရားသေဝါဒ အဆိပ်အတောက်တွေကို ဖယ်ရှားပြီး မိမိရဲ့ ဓမ္မခရီးအတွက် အသုံးဝင်မယ့်၊ လက်တွေ့အကျိုးရှိမယ့် သွန်သင်ချက်တွေ၊ တရားဓမ္မတွေကို ထုတ်ယူကျင့်သုံးနိုင်သူ ဖြစ်ပါတယ်။ တစ်နည်းအားဖြင့် ဘာသာလွတ်သူဆိုတာ “ဝိညာဉ်ရေးဆိုင်ရာတန်ဖိုးတွေကိုအသိအမှတ်ပြု တန်ဖိုးထား ကျင့်သုံးနေတဲ့ လူသားဝါဒီ” (Spiritual Humanist) တစ်ယောက်ပဲလို့ ယေဘုယျ ဆိုနိုင်ပါလိမ့်မယ်။

အပိုင်း-၄ ဆက်ပါဦးမည် ...။

ကျင့်ဝတ်ဆိုင်ရာတရားမျှတမှု (၂)

ကျင့်ဝတ်ဆိုင်ရာတရားမျှတမှု (၂)

-သန်းစိုးနိုင်-

ကျင့်ဝတ်ဆိုင်ရာအဘိဓမ္မာ

          အဆိုပါ ကျင့်ဝတ်ဆိုင်ရာ အမှားအမှန်ပြဿနာများ အကြောင်းကို ပြန်လည်စဉ်းစား သုံးသပ်ကြမည် ဆိုလျှင် အခြေခံမူသဘောနှင့် စီရင်ဆုံးဖြတ်မှုတို့၏ အပြန်အလှန် ဆက်ဆံရေးတို့ကို ဦးစားပေး စဉ်းစားရမည်ပင် ဖြစ်သည်။ အခြေခံမူသဘောမှာ အရင်းခံအားဖြင့် လူတို့သည် တရားမှန်ကန်သော အမှုကိုသာ ပြုလိုကြ၏။ ထိုတရားမှန်ကန်သည့် အမှုကို လက်တွေ့ပြုမူ ဆောင်ရွက်ရင်း အကျိုးသက်ရောက်မှုကို အဆုံးအဖြတ်ပြုကြရ၏။ ထိုအဆုံးအဖြတ်ဖြင့် အခြေခံမူသဘောတို့အပေါ် ထပ်မံဖြည့်ဆည်း ပြုပြင်ကြရမြဲဖြစ်၏။ ယင်းဖြည့်ဆည်းပြုပြင်ထားသည့် အခြေခံမူသဘောကိုပင် လက်တွေ့ပြန်လည်စမ်းသပ်မှု ပြုမူလှုပ်ရှားပြီးနောက် ဆုံးဖြတ်ချက် တစ်စုံတစ်ရာ ချမှတ်ရပြန်သည်။ ယင်းသို့ မူသဘောနှင့် အဆုံးအဖြတ်သဘောတို့ အပြန်ပြန်အလှန်လှန် ဆက်ဆံမှုပြုပြီးသည့်အခါ ကျင့်ဝတ်ဆိုင်ရာ နှုန်း၊ စံ၊ တန်ဖိုးများ အသိအမှတ် ပေါ်ထွန်းလာခဲ့ရသည်။ အဆိုပါ ကျင့်ဝတ်ဆိုင်ရာ နှုန်း၊ စံ၊ တန်ဖိုးများမှာ ရေရှည်ဖြစ်ပေါ် တိုးပွားလာခြင်း၏ အကျိုးဆက်ဖြစ်သော်လည်း မပြောင်းလဲနိုင်သည့် ပုံသေနည်းများကား မဟုတ်ကြပေ။

          ယင်းသို့ ကျင့်ဝတ်ဆိုင်ရာ အခြေခံမူသဘောများနှင့် အဆုံးအဖြတ်ပေးမှုတို့၏ အတွင်းသဘောဆက်ဆံရေးတို့ကို ဂရိခေတ်ကပင် ဆိုကရေးတီး၏ ကထာများ (Dialogues of Socraties) နှင့် အရစ္စတိုတယ် (Aristotal) ၏ ကျင့်ဝတ်ဆိုင်ရာဒဿန(Moral Philosophy) ကျမ်းများတွင် တွ့ခဲ့ကြရသည်။ အရစ္စတိုတယ်၏ အဆိုအရ ကျင့်ဝတ်ဆိုင်ရာ အခြေခံမူများနှင့် ဆုံးဖြတ်ချက်တို့ အပြန်အလှန် ဆက်ဆံမှုပြုရုံမျှဖြင့် ကျင့်ဝတ်ဆိုင်ရာအမြင်များ လင်းပွင့်တိုးတက်မှု မရနိုင်ပေ။ အကြောင်းမှာ အခြေခံမူသဘောတို့မည်သည် ရေရှည်လက်ခံထားသည့် အစွဲအလမ်းများသာ ဖစ်ကြ၏။ ထိုအစွဲအလမ်းများဖြင့် လူ့အဖွဲ့အစည်းအတွင်း ဖြစ်ပျက်နေသမျှကို ကြည့်မြင်နေသမျှ မှန်ကန်သောဆုံးဖြတ်ချက် ချနိုင်မည်မဟုတ်ပေ။ ထိုကျင့်ဝတ်အမြင်များ၏ လင်းပွင့်တိုးတက်မှုဆိုသည်မှာ တစ်ယောက်တည်း ထိုင်စဉ်းစားနေရုံမျှဖြင့် မဖြစ်နိုင်ပေ။ လူတစ်ဦးချင်း၏ စိတ်ထဲ၊ ဦးနှောက်ထဲတွင် အစွဲအလမ်းအခံများကြောင့် ဒွိဟသံသယများ ပဋိပက္ခများဖြင့် မှန်ကန်စွာ ဆုံးဖြတ်ချက်ချနိုင်ဖွယ် မရှိပေ။ ကျင့်ဝတ်အမြင်များ လင်းပွင့်တိုးတက်ရန် မိတ်ဆွေအသိုင်းအဝိုင်း နေ့စဉ်လူမှုဘဝ အပြောင်းအလဲများနှင့် အစဉ်ထိကပ် ဆက်စပ်နေရန်လိုသည်။ ထိုသို့ လူမှုဘဝအဝန်းအဝိုင်းအတွင်းမှ အမြင်ပြောင်းလဲမှုများနှင့် ထိတွေ့ဆက်စပ်နေမှသာ အရိုးစွဲနေသော အခြေခံမူသဘောများကို ဖြည့်ဆည်းပြောင်းလဲနိုင်မည် ဖြစ်၏။ ဤသို့ ပြောင်းလဲနိုင်မှလည်း ကျင့်ဝတ်ဆိုင်ရာအမြင်များ လင်းပွင့်တိုးတက်လာမည်ဖြစ်သည်။

          ပလေတို၏ 'သမ္မတနိုင်ငံ'ကျမ်း အလိုအရ ဆိုကရေးတီးက အထက်ပါအမြင်ရှိသူပုဂ္ဂိုလ်တို့မှာ လိုဏ်ဂူထဲတွင် အကျဉ်းချခံထားရသူများနှင့်တူသည် ဆို၏။ ထိုသူတို့မှာ ဂူထဲရှိ ရုပ်ဝတ္ထုများ၏ အရိပ်ကိုသာ မြင်တွေ့ဖူးပြီး ယင်းတို့ကိုပင် အစစ်အမှန်ဟု ထင်နေခဲ့ကြ၏။ ထိုဂူထဲမှ ထိုးဖောက်ထွက်လာနိုင်သူ ဒဿနပညာရှင်သာ နေရောင်ခြည်အောက်ရှိ အရာများအားလုံးကို ပကတိသဘာဝအတိုင်း မြင်နိုင်စွမ်းရှိကြသည်။ နေရောင်ခြည်အောက်တွင် ရောက်နေသူ ဒဿနပညာရှင်သည်သာလျှင် ဂူထဲရှိ အမှောင်ထုအောက် ရောက်ရှိနေသူများကို အုပ်ချုပ်နိုင်မည် ဖြစ်ပေသည်။ ပလေတိုကိုယ်တိုင်၏ အမြင်အရမူ ကျင့်ဝတ်ဆိုင်ရာ အစွဲအလမ်းများမှ ရုန်းထွက်ကာ နေ့စဉ်နေထိုင်မှုဘဝဆိုင်ရာ ဖြစ်ရပ်များနှင့် ကင်းကွာပြီး စဉ်းစားဆင်ခြင်နိုင်မှ တရားမျှတမှုနှင့် လူ့အဖွဲ့အစည်းဆိုင်ရာ ကောင်းမှု၏သဘောသဘာဝကို ဆုပ်ကိုင်နိုင်မည် ဖြစ်သည်။ ပလေတိုပြောသည့် ကျင့်ဝတ်ဆိုင်ရာ အစွဲအလမ်းများမှ ရုန်းထွက်ရမည်ဆိုသည့် သဘောထားမှာ မှန်ပါသည်။ သို့သော် နေ့စဉ်နေထိုင်မှုဘဝဆိုင်ရာ ဖြစ်ရပ်များနှင့် ကင်းကွာစွာ စဉ်းစားဆင်ခြင်ရမည်ဆိုသည့် သဘောထားမှာ မမှန်ကန်ပါ။ လူမှုအသိုင်းအဝိုင်းအတွင်းမှ နေ့စဉ်ဘဝဆိုင်ရာ အတွေ့အကြုံများနှင့် ပေါင်းစပ်ဖြည့်ဆည်းနိုင်မှသာ ကျင့်ဝတ်ဆိုင်ရာ အစွဲအလမ်းများမှ ရုန်းထွက်စေနိုင်ပြီး ကျင့်ဝတ်များကို လင်းပွင့်ဖွံ့ဖြိုး တိုးတက်စေနိုင်မည် ဖြစ်သည်။ အဆိုပါ ဖွံ့ဖြိုးလာသော ကျင့်ဝတ်အမြင်သစ်များကိုလည်း ကောင်းမြတ်မှန်ကန်မှု ရှိမရှိဆိုသည်ကို လူ့အဖွဲ့အစည်းထဲတွင် လက်တွေ့ပြန်လည် အသုံးချကြည့်ခြင်းဖြင့် ထပ်မံစစ်ဆေးစမ်းသပ်ကြရမည်ဖြစ်သည်။ ထို့ကြောင့် ကျင့်ဝတ်နှင့် လူ့အဖွဲ့အစည်းတို့သည် အပြန်အလှန် ဆက်စပ်နေသကဲ့သို့ အပြန်အလှန် ပဋိပက္ခလည်း ဖြစ်နေကြသည့် ဒိုင်ယာလက်တစ်နည်းကျ ဆက်ဆံရေးဖြစ်သည်။ အလားတူ အခြေခံမူသဘောနှင့် အဆုံးအဖြတ်ပေးမှုတို့သည်လည်း အနုပဋိလောမသဘောအရ အပြန်အလှန် အကြောင်းအကျိုးပြု ဆက်ဆံမှုပင် ဖြစ်သည်။ ဆိုကရေးတီး၏စကားဖြင့် ချုပ်ပြောရလျှင်

          'ဂူထဲရှိ နံရံပေါ်မှအရိပ်များ (ပြည်သူများ) နှင့် ထိတွေ့ဆက်ဆံမှုမပြုသော ဒဿနသည် အတွေးအခေါ်အရ အမြုံသာ ဖြစ်နေပေလိမ့်မည်'

          တချိန်တည်းတွင် ကျင့်ဝတ်ဆိုင်ရာ အမြင်များနှင့် လူ့အဖွဲ့အစည်းတို့ ပေါင်းမိသည့်အခါ နိုင်ငံရေးပြဿနာများအဖြစ်သို့ သဘာဝကျစွာ အသွင်ပြောင်းသွားတော့သည်။ ထိုအခါ ကျင့်ဝတ်ဆိုင်ရာအဘိဓမ္မာက လူ့အဖွဲ့အစည်းကို မည်သို့သောဥပဒေဖြင့် စိုးမိုးအုပ်ချုပ်မည်နည်းဟု မေးခွန်းထုတ်လာနိုင်စရာ ရှိပေသည်။ ပဒေသရာဇ်အုပ်စိုးမှုပုံစံ၊ အရင်းရှင်အုပ်စိုးမှုသဏ္ဌာန်၊ ကွန်မြူနစ်အုပ်စိုးမှုစနစ်တို့သည် လူ့အဖွဲ့အစည်းတွင် လွှမ်းမိုးနေသော ကျင့်ဝတ်နှုန်းစံများနှင့် ကိုက်ညီပါ၏လော။ ဒီမိုကရေစီစနစ်သည် လူ့အဖွဲ့အစည်းအတွင်း တန်းတူညီမျှမှုနှင့် တရားမျှတမှုဆိုသည့် ကျင့်ဝတ်အခြေခံများကို မည်သို့ အာမခံနိုင်မည်နည်း။

          ဤမေးခွန်းများ၏ အဖြေများကို သမိုင်းခေတ်ကာလတလျှောက်ရှိ မတူသောခေတ်တွင် မတူသည့် နိုင်ငံရေးဒဿနပညာရှင်များက အမျိုးမျိုးဖြေရှင်းပြနိုင်ရန် ကြိုးစားခဲ့သည်များ ရှိခဲ့ကြပါသည်။ ဤမှာဘက်တွင် အရစ္စတိုတယ်အီမန်နျူရယ် ကန့် (I.Kant)၊ ဂျွန်စတူးဝပ်မီးလ် (John Stuart Mill)၊ ဂျွန်ရောလ် (John Rawls) နှင့် ကားလ်မာ့က်စ်တို့သည် ကြီးကျယ်ထင်ရှားသည့် ပညာရှင်ကြီးများပင် ဖြစ်ကြသည်။ လူမှုဘဝ ရှင်သန်အသက်ဝင် လှုပ်ရှားစေရန် တွန်းအားပေးခဲ့ကြသည့် တရားမျှတမှုနှင့် အခွင့်အရေး၊ တာဝန်ရှိမှုနှင့် သဘောတူညီမှု၊ ဂုဏ်ပြုမှုနှင့် ကောင်းမှု၊ ကျင့်ဝတ်နှင့် တရားဥပဒေဆိုင်ရာ ပညာရှင်များ၏ အတွေးအမြင်များကို လက်လှမ်းမီသမျှ လေ့လာဆွေးနွေးသွားကြရပါဦးမည်။ သို့မှသာ ကျင့်ဝတ်ဆိုင်ရာ တရားမျှတမှု၏ အမှားအမှန်ပြဿနာကို ပိုမိုပီပြင် ရှင်းလင်းစွာ နားလည်လာနိုင်ပါလိမ့်မည်။

ကျင့်ဝတ်ဆိုင်ရာ တရားမျှတမှု (၁)

ကျင့်ဝတ်ဆိုင်ရာ တရားမျှတမှု (၁)

-သန်းစိုးနိုင်-

          ၂ဝဝ၁ ခု ဇွန်လအတွင်းက အရာရှိငယ် မားကပ်စ်နှင့် အဖွဲ့ဝင် (၃) ဦး ပါဝင်သည့် အမေရိကန် Navy Seals အထူး ထောက်လှမ်းရေးအဖွဲ့ငယ်တစ်ဖွဲ့သည် ပါကစ္စတန်နယ်စပ်အနီး ရှိ အာဖဂန်နိုင်ငံထဲတွင် လျှို့ဝှက်ထောက်လှမ်းရေးမစ်ရှင်တစ်ခုအဖြစ် လှုပ်ရှားနေကြ၏။ ယင်းတို့၏ အဓိကတာဝန်မှာ အိုစမာ ဘင်လာဒင်၏ အနီးကပ်ပုဂ္ဂိုလ်တစ်ဦးဖြစ်သည့် တာလီဘန်ခေါင်းဆောင်တစ်ဦး ပုန်းအောင်းနေထိုင်ရာစခန်းကို ရှာဖွေထောက်လှမ်းရန် ဖြစ်သည်။ ထောက်လှမ်းရေးသတင်းများအရ အဆိုပါ တာလီဘန်ခေါင်းဆောင်သည် တောတန်းများအကြားရှိ ရွာပုန်းတစ်ခုတွင် လက်နက်ကိုင်အင်အား ၁၅ဝ ခန့်နှင့်အတူ နေထိုင်လျက်ရှိသည်။ သို့ဖြင့် မားကပ်စ်တို့အဖွဲ့သည် အဆိုပါရွာပုန်းကို စီးမိုးမြင်သာနိုင်မည့် တောင်ကြောပေါ်သို့ တက်လာခဲ့ကြသည်။

          တောင်ကြောပေါ်တွင် ထောက်လှမ်းရေးတပ်ဖွဲ့ နေရာယူပြီးချိန်မှာပင် ကောင်ရေတစ်ရာကျော်ခန့်ရှိသည့် ဆိတ်အုပ်တစ်အုပ်ကို မောင်းလာသည့် ဆိတ်ကျောင်းသား သုံးဦးနှင့် ပက်ပင်းတိုးမိကြတော့သည်။ ဆိတ်ကျောင်းသမားများမှာ လက်နက်တစ်စုံတစ်ရာ ကိုင်ဆောင်ထားခြင်းမရှိသည့် သာမန်အာဖဂန်အရပ်သားများ ဖြစ်ကြ၏။ သို့တိုင် ပုံမှန်လှည့်လည် ဆိတ်ကျောင်းသွားမည့် လူများလော (သို့) တာလီဘန်များထံ ပြေး၍ သတင်းပေးမည့်သူများလော မခွဲခြားနိုင်ပေ။ ယင်းတို့ကို ဖမ်းချုပ်ချည်နှောင်စရာလည်း ဘာပစ္စည်းကိရိယာမျှ မပါခဲ့ကြချေ။ ထိုအခါ ထောက်လှမ်းရေးအဖွဲ့အနေဖြင့် စဉ်းစားဆုံးဖြတ်စရာဆို၍ နှစ်ချက်သာရှိတော့သည်။ ဆိတ်ကျောင်းသမားများ အားလုံးကို သတ်ပစ်လိုက်မည်လော (သို့) လုံးဝအပြီးတိုင် လွှတ်ပေးလိုက်တော့မည်လော။

          ထိုအခါ လျှို့ဝှက်ထောက်လှမ်းရေး အဖွဲ့ဝင်များအကြားတွင် သဘာဝကျစွာ အငြင်းပွားစရာ ဖြစ်လာတော့သည်။ အဖွဲ့ဝင်တစ်ဦးက 'ယခုအချိန်မှာ ကျွန်တော်တို့ဟာ ကျွန်တော်တို့ အသက်ရှင်ရပ်တည်ရေးအတွက် လုပ်သင့်တာမှန်သမျှ အားလုံးလုပ်ပိုင်ခွင့်ရှိတယ်။ စစ်ဘက်ရေးရာ အမြင်အရ ပြောရရင် ရှင်းပါတယ်။ သူတို့ကို လွှတ်ပေးလိုက်လို့မရဘူး။ အကုန်လုံး သတ်ပစ်လိုက်ဖို့ပဲရှိတယ်' ဟူ၍ သူ့သဘောထားကို ရှင်းလင်းပြတ်သားစွာ ပြောကြားခဲ့၏။ ကျန်အဖွဲ့ဝင်နှစ်ဦးကမူ သူတို့သဘောထားကို ဖော်ပြလိုသောဆန္ဒ မရှိကြ။ အထက်အရာရှိ ဆုံးဖြတ်သည့်အတိုင်း နာခံလိုသော သဘောထားသာ ရှိကြ၏။ အရာရှိဖြစ်သူ မားကပ်စ်၏ ဆန္ဒကလည်း ရှင်းပစ်လိုက်မှဖြစ်မည် ဆိုသောအမြင် ရှိ၏။ သို့သော် ဘာသာရေးအစွဲအလမ်းကြီးသူ မားကပ်စ်အနေဖြင့် လက်နက်မဲ့အရပ်သားများကို သတ်ပစ်လိုသောဆန္ဒက နည်းနည်းမျှမရှိလှ။ သို့ဖြင့် လက်နက်မဲ့အရပ်သား ဆိတ်ကျောင်းသမားသုံးဦးကို လွှတ်ပေးလိုက်တော့သည်။ သို့တိုင် နာရီပိုင်းအတွင်းမှာပင် သူ့ဆုံးဖြတ်ချက် လုံးဝမှားသွားပြီဖြစ်ကြောင်း မားကပ်စ်ကိုယ်တိုင် ကောင်းစွာ သိရှိနားလည်ခဲ့ရသည်။ သို့သော် သူ၏ အမှားမှာ လုံးဝပြင်ဆင်ခွင့်မရအောင် နောက်ကျသွားခဲ့ရလေပြီ။

          မားကပ်စ်တို့လျှို့ဝှက်ထောက်လှမ်းရေးအဖွဲ့ဝင် လေးဦးကို AK 47 နှင့် ဒုံးကျည်လက်နက်မျိုးစုံ တပ်ဆင်ထားသည့် တာလီဘန်တပ်ဖွဲ့ဝင် အင်အားတစ်ရာနီးပါးခန့်တို့က ဝိုင်းဝန်းပစ်ခတ် တိုက်ခိုက်ခဲ့ကြ၏။ ပြင်းထန်သည့် တိုက်ပွဲဖြစ်စဉ်၏ မိနစ်ပိုင်းအတွင်းမှာပင် မားကပ်စ်၏ ရဲဘော်သုံးဦးစလုံး ကျဆုံးသွားခဲ့ရသည်။ မားကပ်စ်က ဆက်သွယ်ရေးစက်နှင့် အကူအညီတောင်းသဖြင့် ကူညီရန်ရောက်ရှိလာသည့် ရဟတ်ယာဉ်တစ်စီးသည် ဒုံးကျည်ထိမှန် ပျက်စီးသွားခဲ့ရသည်။ အဆိုပါ ရဟတ်ယာဉ်ပျက်စီးမှုနှင့်အတူ လိုက်ပါလာသည့် Navy Seals အထူးတပ်ဖွဲ့ဝင် (၁၆) ဦးလည်း ကျဆုံးသွားခဲ့ရသည်။ မားကပ်စ်ကိုယ်တိုင်မှာလည်း ဒဏ်ရာပြင်းထန်သဖြင့် တောင်ပေါ်မှအောက်သို့ လှိမ့်ချလိုက်ရသည်။ ထိုမှ ၇ မိုင်ခန့်ဝေးသည့် ပက်ရ်ှထွန်ရွာသို့ လေးဘက်ထောက် အရောက်သွားပြီး ပုန်းအောင်းနေခဲ့သည်။ နောက်ပိုင်းတွင် မားကပ်စ်သည် သူ၏ အတွေ့အကြုံများနှင့်ပတ်သက်၍ စာအုပ်တစ်အုပ် ရေးခဲ့ရာ၌

          'ဒါဟာ ကျွန်တော့်ဘဝတလျှောက်လုံးမှာ အရူးသွပ်ဆုံး၊ အမိုက်မဲဆုံး၊ အဆိုးဝါးဆုံး ချမှတ်မိတဲ့ ဆုံးဖြတ်ချက် တစ်ရပ်ပါ။ ကျွန်တော်လည်း စိတ်လွတ်ကိုယ်လွတ်များ ဖြစ်နေသလား မသိပါဘူး။ တကယ်တော့ ကျွန်တော့်ဆုံးဖြတ်ချက်က ကျွန်တော့်ရဲဘော်တွေကို သေဒဏ်ချမှတ်ရာမှာ လက်မှတ်ထိုး ပေးလိုက်မိတာပါပဲ။ ဒီဆုံးဖြတ်ချက်ချတာ ကျွန်တော်ပါ။ ဒီဆုံးဖြတ်ချက်အမှားဟာ သူတို့တွေ ကျွန်တော့်ကို တက္ကဆက်အရှေ့ပိုင်းသုဿာန်မှာ ဂူသွင်းသဂြုင်္ိဟ်လိုက်တဲ့အချိန်အထိ ကျွန်တော်နှင့်အတူ ရှိနေတော့မှာပါ'

          ဟူ၍ နောင်တကြီးစွာဖြင့် ဖော်ပြခဲ့ပါသည်။

          မည်သို့ပင်ဖြစ်စေ ဤဖြစ်ရပ်၏ အခြေခံပြဿနာမှာ သာမန်မှားခြင်း မှန်ခြင်း ကိစ္စသက်သက်မျှသာ မဟုတ်ပါ။ ကျင့်ဝတ်အမြင်နှင့် ယှဉ်တွဲသုံးသပ်ရမည့် အမှားအမှန်ပြဿနာ ဖြစ်သည်။ ကျင့်ဝတ်သဘောအရ ပြောကြမည်ဆိုလျှင် သာမန်လက်နက်မဲ့အရပ်သားများကို လက်နက်ကိုင်တပ်ဖွဲ့မှ သတ်ဖြတ်ခြင်းသည် အလွန်ကြီးမားသည့် ကျင့်ဝတ်ဆိုင်ရာ အမှားကြီးတစ်ရပ် ဖြစ်သည်။ သို့တိုင် သာမန်အရပ်သားမဟုတ်ဘဲ သူလျှိုဒလံ၊ ရန်သူ့ဘက်တော်သားများ အမှန်ပင် ဖြစ်နေပြန်လျှင်လည်း စစ်ရေးပဋိပက္ခ ပြင်းထန်နေချိန်မျိုးတွင် အရေးယူသတ်ဖြတ်ခြင်းမှာ နှိုင်းယှဉ်မှုအရ မှန်သည်ဟု ဆိုရမည်သို့ ရှိနေပြန်၏။ မည်သို့ပင်ဖြစ်စေ အမှားအမှန်ပြဿနာကို ကျင့်ဝတ်ပြဿနာရှုထောင့်တစ်ခုတည်းမှကြည့်လျှင် အဆုံးအဖြတ်ပေးရန်ခက်သည့် မသေချာ မရေရာမှုများ ရှိနေနိုင်ကြောင်း သတိပြုအပ်ပေသည်။ ထို့ပြင် ကျင့်ဝတ်ပြဿနာ၏ အခြား အရေးပါသည့် မျက်နှာစာတစ်ရပ်မှာ တရားမျှတမှုပင် ဖြစ်သည်။ ယေဘုယျအားဖြင့် လက်နက်မဲ့ သာမန်အရပ်သားများကို လက်နက်ကိုင်တပ်ဖွဲ့တစ်ဖွဲ့က လက်နက်ဖြင့် တိုက်ခိုက်သတ်ဖြတ်မှုသည် အလွန်ဆိုးဝါးယုတ်ညံ့သည့် တရားမျှတခြင်း ကင်းမဲ့မှုတစ်ရပ် ဖြစ်သည်။ သို့တိုင် ရန်ဘက်စစ်တပ်ချင်း အပြန်အလှန် လက်နက်ကိုင်တိုက်ခိုက်ကြခြင်းမှာမူ သာမန်အားဖြင့် တရားမျှတသည့် ဖြေရှင်းနည်းဟု ဆိုရပေမည်။ ခြုံပြောရလျှင် ကျင့်ဝတ်ပြဿနာ၏ အခြေခံစံထားချက်တစ်ရပ်မှာ တရားမျှတမှုရှိခြင်း မရှိခြင်း ဖြစ်သည့်အလျောက် ကျင့်ဝတ်ဆိုင်ရာ အမှား အမှန်ကို စဉ်းစားဆုံးဖြတ်ရာတွင် တရားမျှတမှု ပြဿနာကို လည်း ထည့်သွင်းစဉ်းစားရန် မလွဲမသွေ လိုအပ်ပါလိမ့်မည်။

တရားမျှတမှု၏ အမှားအမှန်

         

ယေဘုယျအားဖြင့် ဖွံ့ဖြိုးပြီး ဒီမိုကရေစီနိုင်ငံများတွင် ကျင့်ဝတ်ဆိုင်ရာ တရားမျှတမှု ရှိခြင်း မရှိခြင်း ပြဿနာများ၏ အမှားအမှန်ကိစ္စများ၌ များသောအားဖြင့် အမြင်မတူကြသည် များ၏။ အနောက်တိုင်းနိုင်ငံများတွင် အချို့က ကိုယ်ဝန်ဖျက်ချခြင်းကို မှန်ကန်သည်ဟု ထောက်ခံကြ၍ အချို့က မှားယွင်းသည်ဟု ကန့်ကွက်နေကြပေသည်။ အချို့က ဆင်းရဲသားများကို ထောက်ပံ့ကူညီနိုင်ရန် ချမ်းသာသူများအား အခွန်ကောက်ခံရန် အားပေးခဲ့ကြပြီး၊ အချို့ကမူ ယင်းတို့၏ အရည်အချင်းနှင့် ကြိုးပမ်းမှုတို့ကြောင့် ရရှိလာကြသည့် အကျိုးအမြတ်ပေါ်တွင် အခွန်ကောက်ခံရန်မလိုဟု ယူဆကြ၏။ အချို့ပုဂ္ဂိုလ်များက အကြမ်းဖက်သမားအဖြစ် သံသယရှိသူများအား ဖမ်းဆီးနှိပ်စက်ခြင်းကို ကန့်ကွက်ပြောဆိုနေကြစဉ် အချို့က အကြမ်းဖက်သမား နှိမ်နင်းရေးတွင် ဤသည်မှာ အကောင်းဆုံးနှင့် နောက်ဆုံးနည်းလမ်း ဖြစ်သည်ဟု ယုံကြည်နေကြ၏။ အမေရိကန်နိုင်ငံ၏ အချို့သော ပြည်နယ်များတွင် အကြမ်းဖက်သမားများကို သေဒဏ်ပေးသည့်စနစ် ကျင့်သုံး၍ အချို့ပြည်နယ်များကမူ ရာသက်ပန် ထောင်ဒဏ်ပေးသည့်စနစ် ကျင့်သုံးကြ၏။ ဆိုရလျှင် အမြင်ကွဲပြားခြားနားမှုများ အမှန်ပင်ရှိနေခဲ့ကြသည်။

         

မည်သို့ပင်ဖြစ်စေ တရားမျှတမှု၏ အမှားအမှန်ဆိုင်ရာ လွတ်လပ်စွာ ဆွေးနွေးငြင်းခုံမှုများကြောင့် လူအချို့ ရွေးကောက်ပွဲအနိုင်ရပြီး အချို့ရှုံးနိမ့်ကြရ၏။ ပုဂ္ဂိုလ်အချို့ သမ္မတဖြစ်လာပြီး အချို့ရာထူးလက်လွတ်ခဲ့ကြ၏။ ယင်းသို့ ကျင့်ဝတ်ဆိုင်ရာ ငြင်းခုံပွဲများ လူထုထဲတွင် လွတ်လပ်စွာ ကျင်းပနိုင်ခဲ့ခြင်းကြောင့် ကျင့်ဝတ်ဆိုင်ရာ အမှားအမှန် ပြဿနာများကို ရှင်းလင်းပြတ်သားစွာ ဆုံးဖြတ်ဖြေရှင်းနိုင်သည်ကား မဟုတ်ပေ။ ဒီမိုကရေစီစနစ်ဖြင့် အများစု အနည်းစု ပြဿနာများကိုကား အဆုံးအဖြတ်ပေးနိုင်စွမ်း ရှိမည်မဟုတ်ပေ။ ရံဖန်ရံခါတွင် အမှန်တရားသည် လူနည်းစုဘက်တွင် ရှိနေတတ်ပေသည်။ ထို့ပြင် မိမိတို့၏ ကျင့်ဝတ်ဆိုင်ရာ အမြင်များသည် ပြုပြင်ဖြည့်ဆည်းရန် မလိုတော့သည့် အမှန်တရားများပင်ဖြစ်သည် ဆိုသည့် တရားသေ အစွဲအလမ်းများကို ဆုပ်ကိုင်ထားခြင်းသည် ဂလိုဘယ်လိုက်ဇေးရှင်း ခေတ်သစ်ဆီသို့ ချီတက်နေသည့် ကမ္ဘာကြီး၏ အထွေထွေဦးတည်ချက်နှင့် ဆီလျော်ကိုက်ညီခြင်း မရှိတော့ပေ။ မည်သို့ပင်ဆိုစေ လွတ်လပ်စွာ ဆွေးနွေး ငြင်းခုံခြင်းများက အပြောင်းအလဲများကို လက်ခံစဉ်းစားရန် အနိမ့်ဆုံးအားဖြင့် တွန်းကန်အားပေးနိုင်လိမ့်မည်။ ထိုအခါတွင် တရားမျှတမှုနှင့် မတရားမမျှတမှု / တန်းတူညီမျှမှုနှင့် တန်းမတူမညီမျှမှု / တစ်ဦးချင်းအခွင့်အရေးနှင့် အများကောင်းစားရေး စသည်တို့ကို မည်သို့အကြောင်းအကျိုးရှိသော ဆင်ခြင်တုံတရားဖြင့် စဉ်းစားလက်ခံကြမည်နည်း။

အပိုင်း (၂) ဆက်ပါဦးမည် …

တရားမျှတတယ်ဆိုတာ ဘာလဲ (၂)

ယမန်နေ့မှအဆက် .......

တရားမျှတတယ်ဆိုတာ ဘာလဲ (၂)

         

သို့သော် ချာလီမုန်တိုင်းတိုက်ပြီးနောက် ထူးခြားသောအနေအထားအောက်တွင် လုပ်ငန်းရှင်များက ဈေးနှုန်းများမြှင့်တင်လိုက်ကြ၏။ ယင်းတို့အား ဤသို့ဈေးနှုန်းမြှင့်တင်လိုက်ခြင်းဖြင့် ဈေးကောင်းရလိုသော ထုတ်လုပ်သူများက ပြည်သူလူထု လိုအပ်တာမှန်သမျှ အလျင်အမြန် အမြောက်အများ ထုတ်လုပ်လာကြသဖြင့် ပြန်လည်ထူထောင်ရေးလုပ်ငန်းများ မြန်ဆန်သွက်လက်လာသည်ဟု ဆိုကြ၏။ ထို့ပြင် မုန်တိုင်းကျလိုက်သည့် ထူးခြားသောအခြေအနေမျိုးအောက်တွင် စားသုံးသူများ၏ လွတ်လပ်စွာရွေးချယ်ခွင့်ဆိုသည်မှာ မလွှဲမရှောင်သာစွာ အကန့်အသတ်ရှိလာ၏။ စားသုံးသူများ၏ ဝယ်လိုအား ရုတ်တရက် မြင့်တက်များပြားလာခြင်းကြောင့် ဈေးကွက်သဘာဝအရ အပြိုင်အဆိုင်ရောင်းချကြရင်း ဈေးနှုန်းမြင့်တက်လာရခြင်းဖြစ်သည်ဟူ၍ ခုခံချေပခဲ့ကြသည်။

         

သို့သော် စားသုံးသူများဘက်ကလည်း ဝယ်လိုအား များပြားလာခြင်း၊ ကုန်စည်ပြတ်လပ်ခြင်းတို့ကြောင်း ဈေးနှုန်းမြင့်တက်မှု အတန်အသင့်ရှိလာခြင်းမျိုးကို နားလည်ပေးနိုင်ကြ၏။ 'မျက်ဖြူဆိုက်လေ ဆရာကြိုက်လေ' ဆိုသော သဘောထားဖြင့် လူအများ သေကောင်ပေါင်းလဲဖြစ်နေချိန်မျိုးတွင် ကုန်ဈေးနှုန်းများ မိုးသို့ထိုးထောင် အပြိုင်အဆိုင် မြှင့်တင်နေ ကြသည့် လုပ်ငန်းရှင်'လင်းတ'ကြီးများကို ဒေါသထွက်နေကြခြင်းဖြစ်၏။ ယင်းသို့ပေါက်ကွဲထွက်လာသည့် ဒေါသမှာ အရင်းခံအားဖြင့် တရားလွန်'တရားမမျှတမှု' (Injustice)ဟူသည့် စိတ်ခံစားမှု ပေါ်ပေါက်လာခြင်းဖြစ်သည်။ ထို့ကြောင့် ပြည်နယ်ရှေ့နေချုပ် ခရစ်က 'စားသုံးသူများရဲ့ ဒေါသပေါက်ကွဲမှု အရင်းအမြစ်မှာ ဈေးကွက်အခြေခံကြောင့်မဟုတ်၊ ကျင့်ဝတ်အခြေခံကြောင့်သာ ဖြစ်တယ်။ မုန်တိုင်းကြောင့် လူထုဒုက္ခမျိုးစုံ ခံစားနေရချိန်မျိုးမှာ ရသလောက် အမြတ်ထုတ်လိုက်မယ် ဆိုတဲ့ လောဘရမ္မက်စိတ်ကို ဒေါသထွက်နေကြတာပါ' ဟု ကောက်ချက်ချခဲ့၏။

         

လောဘရမ္မက်ဆိုသည်မှာ မကောင်းမှု အကုသိုလ်စိတ်ဖြစ်၏။ အထူးသဖြင့် မုန်တိုင်းကြောင့် လူထုဒုက္ခရောက် နေချိန်မျိုးတွင် လောဘရမ္မက်တက်သောစိတ်မှာ ကျင့်ဝတ်သဘောအရ အလွန်ဆိုးရွားလှ၏။ ထို့ပြင် ဤယုတ်ညံ့သော စိတ်ထားမျိုးကို လူတစ်ဦးတစ်ယောက်ချင်းအပေါ် ထားရှိခြင်း မဟုတ်။ လူ့အဖွဲ့အစည်းအပေါ် ထားရှိခြင်းဖြစ်၍ ပိုမိုရိုင်းစိုင်း ယုတ်မာလှ၏။ လူ့အဖွဲ့အစည်းအပေါ် ထားရှိသည့် ဤစိတ်ရိုင်းစိတ်မိုက်မျိုးကို လူ့အဖွဲ့အစည်းကလည်း ထိုက်တန်သည့် ပြစ်ဒဏ်ပြန်ခတ်သင့်ပေသည်။ သို့မှသာလျှင် ပြည်သူများကလည်း 'တရားမျှတသည်' (Justice) ဟု ယူဆကြပေလိမ့်မည်။ ထို့ကြောင့်လည်း ကမ္တွာကြီးကို စစ်မီးစစ်လျှံထဲသို့ ထိုးသွင်းလာခဲ့သော ဟစ်တလာအား သမိုင်းက ဒဏ်ခတ်ခဲ့ခြင်းကို ပြည်သူများက ကြိုဆိုခဲ့ကြခြင်းဖြစ်၏။ နျူရင်ဘတ် စစ်ခုံရုံးသည် နာဇီစစ်ရာဇဝတ်ကောင်များကို ထိုက်တန်စွာ သေဒဏ်ပေးလိုက်ခြင်းဖြင့် ကမ္တွာကြီး၏ 'တရားမျှတမှုဆိုင်ရာ' စံနမူနာ ဖြစ်လာခဲ့ရပေသည်။ ထို့အတူ ယနေ့ မီလိုဆီဗစ်ကဲ့သို့သော စစ်ရာဇဝတ်ကောင်များကို စစ်ဆေးအပြစ်ဒဏ်ပေးနေသည့် ဟိဂ်မြို့ရှိ 'ကမ္တွာ့တရားခုံရုံး'သည်လည်း ကမ္ဘာကြီး တွင် 'တရားမျှတမှု'ထွန်းကားရေးအတွက် အာမခံချက်ပေးနေသည့်နေရာပင် ဖြစ်သည်။ ချုပ်ကြည့်လျှင် ဆိုခဲ့သည့်အတိုင်း 'တရားမျှတမှု'ဆိုသည်တွင် ပြည်သူများ သက်သာအဆင်ပြေရေးနှင့် 'လွတ်လပ်ခွင့်'သာမက 'ကောင်းမွန်မြင့်မြတ်သည့် ကျင့်ဝတ်နှုန်းစံများ' ပါဝင်ရန်လည်း အရေးကြီးပေသည်။ ထိုကောင်းမြတ်သည့် ကျင့်ဝတ်နှုန်းစံများ ဥပဒေအဖြစ် ပုံပေါ်မှသာလျှင် 'တရားမျှတမှု'ကို အပြည့်အဝ ခံစားခွင့်ရမည် ဖြစ်ပေသည်။ ယင်းသို့ လူ့အဖွဲ့အစည်းတွင် 'တရားမျှတမှု လွှမ်းမိုးရေးအတွက် မြင့်မြတ်ကောင်းမွန်သောကျင့်ဝတ်များ' တရားဥပဒေအဖြစ် ရှင်သန်လှုပ်ရှားလာရေးဆိုသည်မှာ 'ခေတ်သစ်နိုင်ငံရေးဒဿနနယ်ပယ်'ကို အကြီးကျယ်ဆုံး စိန်ခေါ်နေသော မေးခွန်းကြီးပင်ဖြစ်ပေသည်။

- တရားမျှတသော လူ့အဖွဲ့အစည်းတွင် ပြည်သူများအတွင်း မြင့်မြတ်ကောင်းမွန်သော ကျင့်ဝတ်များ တိုးပွားကောင်းမွန်လာအောင် စွမ်းဆောင်နေပါသလော။

(သို့မဟုတ်)

- ပြည်သူများအနေဖြင့် ကောင်းမွန်သည့် ဘဝနေထိုင်မှုပုံစံကို သူတို့ကိုယ်တိုင် ရွေးချယ်နိုင်ရေးအတွက် တရားဥပဒေသည် မတူသောကောင်းမှုဆိုင်ရာ အမြင်အမျိုးမျိုးကြားတွင် ပါဝင်ဆုံးဖြတ်ပေးနိုင်ခြင်းမရှိဘဲ ကြားနေအဖြစ် ရှိနေသင့်ပါသလော။

         

ကောင်းမှုနှင့် မကောင်းမှုဆိုသည့် ကျင့်ဝတ်ဆိုင်ရာ ကျမ်းဂန်များအလိုအရ အထက်ပါမေးခွန်းများကပင် နိုင်ငံရေးဒဿနဆိုင်ရာ ရှေးရိုးစံထားအမြင်နှင့် ခေတ်သစ်အတွေးအမြင်တို့ကို စည်းတားခွဲခြားပေးခဲ့ခြင်းဖြစ်ပါသည်။ အရစ္စတိုတယ် (Aristotle) ၏ အမြင်အရ 'တရားမျှတမှု' ဆိုသည်မှာ လူထုကို ယင်းတို့နှင့်ထိုက်တန်သည့် ကျင့်ဝတ်ဆိုင်ရာတန်ဖိုးများကို အပ်နှင်းခြင်းပင်ဖြစ်၏။ ထိုသို့အပ်နှင်းရန်အတွက် မည်သူက မည်သည်နှင့်ထိုက်တန်သည်ကို ဆုံးဖြတ်ရန် ကောင်းမှုနှင့် မကောင်းမှုတို့ကို ခွဲခြားနိုင်ရမည်ဖြစ်ပြီး မည်သို့သော ကောင်းမှုက မည်မျှထိုက်တန်သည်ကိုလည်း အဆုံးအဖြတ်ပေးရမည်ဖြစ်၏။ ထို့ပြင် သူ၏အယူအဆအရ မည်သို့သော လူမှုဘဝပုံစံက လူထု၏စိတ်ဆန္ဒနှင့် ကိုက်ညီသည်ကို တိုင်းပြည်၏ဖွဲ့စည်းပုံဥပဒေ၏စနစ်တစ်ရပ်က ရောင်ပြန်ဟပ်ပြနိုင်စွမ်းမရှိလျှင် အဆုံးအဖြတ်ပေး ပုံဖော်နိုင်ရန် အခက်အခဲရှိ၏။ ချုပ်လိုက်လျှင် အရစ္စတိုတယ်၏ သဘောထားမှာ ပြည်သူလူထု၏ ကောင်းမွန်သော နေထိုင်မှုဘဝပုံစံကို ပုံဖော်ပေးနိုင်ရေးတွင် တရားဥပဒေသည် ကြားနေပေး၍မဖြစ်နိုင်ပေ။

         

အထက်ပါအမြင်နှင့် ဆန့်ကျင်စွာပင် ခေတ်သစ် ဒဿနပညာ၏ဖခင် အီမယ်နျူရယ်ကန့် (Immanule kant) မှ ၂ဝ ရာစု နိုင်ငံရေးဒဿနပညာရှင် ဂျွန်ရောလ် (John Rawls) အထိသော ပုဂ္ဂိုလ်ကြီးများကမူ တရားမျှတမှုဆိုသည်ကို အဓိပ္ပာယ်ဖွင့်ဆိုမှုသည် ကောင်းမွန်သောကျင့်ဝတ် (သို့) လူမှုဘဝပုံစံစသည့် အခိုင်အမာ အကြောင်းအချက်အချို့ကို အခြေပြု၍ မဆုံးဖြတ်သင့်၊ တရားမျှတသည့် လူ့အဖွဲ့အစည်း၌ ကောင်းမွန်သော နေထိုင်မှုဘဝပုံစံကို ရွေးချယ်ခွင့်တွင် လူတစ်ဦးချင်းစီ၏ လွတ်လပ်မှုကို အပြန်အလှန် လေးစားအသိအမှတ်ပြုရန် လိုအပ်လိမ့်မည်ဟု ယူဆကြသည်။ ဆိုရလျှင် ကျမ်းရိုးအယူအဆများက 'ကောင်းမြတ်မှန်ကန် သောကျင့်ဝတ်'ကို စံထားခဲ့ကြပြီး ခေတ်သစ်နိုင်ငံရေးဒဿနကမူ 'လွတ်လပ်ခွင့်ကို မဏ္ဍိုင်ပြု စဉ်းစားတွေးခေါ်ခဲ့ကြပေသည်။

         

ဆိုရလျှင် အထက်ပါနိုင်ငံရေးဒဿနနှင့် စပ်လျဉ်းသည့် ရှေးရိုးစံထား အမြင်များနှင့် ခေတ်သစ်ဒဿနအယူ အဆများ ကိုယ်စီပင်လျှင် အားကောင်းချက်အားနည်းချက် ကိုယ်စီရှိကြသည်ပင်ဖြစ်၏။ အထူးသဖြင့် ဒဿနပညာရှင်များအကြားထက် သာမန်ပြည်သူလူထုအကြားတွင် 'တရားမျှတမှု' ဆိုသည်နှင့် စပ်လျဉ်း၍ ပိုမိုကျယ်ပြန့်ရှုပ်ထွေးသော အမြင်အမျိုးမျိုး ရှိတတ်ကြပေသည်။ စင်စစ်အားဖြင့် 'တရားမျှတမှု'ကို အလေးအနက် ဖွင့်ဆိုရခြင်းမှာ လူ့လောကအနှံ့အပြားတွင်  'မတရားမမျှတမှုများ' အနှံ့အပြားရှိသောကြောင့်ပင် ဖြစ်၏။ မတရားမမျှတမှုများကို ကျော်လွှားအနိုင်ယူနိုင်ရေးအတွက် တရားမျှတမှု၏ အခြေခံများကို ရှင်းလင်းပီပြင်စွာ နားလည်ထားရန် လိုအပ်ပေသည်။ လူတိုင်း တရားမျှတမှုကို လိုလားတောင်းဆိုကြခြင်း၏ ဦးတည်ချက်မှာ ကောင်းမြတ်မှန်ကန်သည့် ကျင့်ဝတ်များ လွှမ်းမိုးသည့် ဖွံ့ဖြိုးတိုးတက်သော လူ့အဖွဲ့ အစည်းမျိုးကို ဖန်တီးလိုကြ၍ပင်ဖြစ်သည်။ တနည်းဆိုရလျှင် ကြွယ်ဝချမ်းသာ၍ လွတ်လပ်သော လူ့အဖွဲ့အစည်းမျိုးကို တောင့်တလိုလားကြခြင်းဖြစ်၏။ ထိုလိုလားချက်များကို ဖွဲ့စည်းပုံအခြေခံဥပဒေဘောင်ထဲတွင် ထည့်သွင်းတည်ဆောက်နိုင်မှသာ လူ့အဖွဲ့အစည်းတွင် 'တရားမျှတမှု'သည် ရှင်သန်သက်ဝင်လာမည်ဖြစ်သည်။ ထို့ကြောင့်လည်း လွတ်လပ်ရေးခေတ် နိုင်ငံတော်သီချင်းတွင်

'တရားမျှတ လွတ်လပ်ခြင်းနှင့်မသွေ

ဒို့ပြေ ဒို့မြေ၊ များလူခပ်သိမ်း ငြိမ်းချမ်းစေဖို့

ခွင့်တူညီမျှ ဝါဒဖြူစင်တဲ့ပြေ' စသည့် စကားလုံးများ ပါဝင်ခဲ့ခြင်း ဖြစ်ပေမည်။